GAZETA ALBANIA

FMN do të fillojë një mision vlerësimi në Turqi

Fondi Monetar Ndërkombëtar njoftoi dje se do të nisë në muajin maj një mision vlerësimi në Turqi. "Autoritetet turke dhe drejtoria e FMN-së ranë dakord që bisedimet për raportin e përvitshëm ekonomik lidhur me ekonominë turke në vitin 2010, do të fillojnë me vizitën e një misioni të FMN-së në 15-ditëshin e parë të majit",- deklaroi Caroline Atkinson, zëdhënëse e FMN-së, në një komunikatë për shtyp. Vizita e këtij lloji nga ana e FMN-së në Turqi, është zhvilluar përpara tre vitesh. Ndërkohë, FMN-ja diskuton çdo vit me anëtarët e saj për gjendjen e ekonomisë së tyre, që sipas Atkinson, jep shkas për publikimin e përvitshëm të një dokumenti të njohur si “Artikulli IV”. Nga ana tjetër, autoritet e Ankarasë dhe organizata me qendër në Uashington po diskutojnë mes tyre që prej më tepër se një viti për mundësinë e një huaje të FMN-së për Turqinë, që disa herë u duk se do të ishte shumë e afërt, por në fakt asnjë marrëveshje nuk është arritur deri tani për shkak të modaliteteve, si dhe kërkesës së bërë nga Ankaraja për një lehtësim të financimit.

Eksportet kineze drejt Europës rriten me 50 për qind në shkurt

Kina thotë se eksportet në muajin shkurt u rritën me një ritëm më të shpejt sesa në tre vitet e fundit. Sipas Pekinit, eksportet u rritën në afro 50 për qind, ose në thuajse 95 miliardë dollarë. Ky është një lajm i mirëpritur për udhëheqësit e Kinës. Rënia ekonomike globale çoi në rënie të kërkesave për mallra kineze vitin e shkuar. Shumë fabrika u mbyllën dhe punëtorët u nxorën në rrugë. Këto shifra të fundit tregojnë se bota përsëri po blen mallrat e prodhuara në Kinë. Eksportet u rritën rreth 50 për qind në shkurt. Importet u rritën në një masë të njëjtë. Por analistët thonë se këto shifra nuk janë ende aq mbresëlënëse sa duken. Eksportet në vitin 2009 ishin kaq të ulëta, thonë ata, saqë dihej që ato do të shënonin rritje këtë vit. Ata thonë megjithatë se rritja në shkurt i kalon parashikimet. Shumë besojnë se makina eksportuese kineze është kthyer përsëri në binarët e saj. Rritja e eksporteve mund të rrisë presionin ndaj Pekinit për të lejuar vlerësimin e monedhës së saj. Qeveritë dhe bizneset e huaja argumentojnë se një juan i zhvlerësuar që i bën më të lira eksportet kineze, po ndihmon rritjen e tyre.

SHBA heq kufizimet tregtare për internetin

Shtetet e Bashkuara do të heqin disa kufizime tregtare ndaj Iranit, Sudanit dhe Kubës në një përpjekje për të inkurajuar përdorimin e internetit në këto vende. Amerikanët do të heqin kufizimet mbi eksportin e teknologjisë së internetit dhe të përdorimit të rrjeteve sociale në këto tri vende. Një zyrtar i Departamentit të Shtetit tha se qeveria amerikane po bënte investime të mëdha në teknologji për t'iu mundësuar njerëzve përdorimin e internetit, pavarësisht nga masat e qeverive në këto vende për ta bllokuar atë. Liria e internetit po shndërrohet me shpejtësi në një nga parimet e politikës së jashtme amerikane.

11 Mars 2010

Ekonomi